Tuesday, 8 January 2019

डेह नागौर में राजस्थानी भासा रा तेरह साहित सम्मान री घोषणा

डेह नागौर में राजस्थानी भासा रा तेरह साहित सम्मान री घोषणा
 
-राजस्थानी भाषा री विविध विधावां में सम्मान
-3 फरवरी ने हुवेला पुरस्कार समारोह
नागौर
नेम प्रकासण डेह जिला नागौर राजस्थान रै कांनी सूं राजस्थानी भासा री
न्यारी-न्यारी विधावां सारू इण बरस 2018-19 में तेरह राजस्थानी
पुरस्कारां री घोसणा करी। संस्थान रा पवन पहाडिय़ा बताया क पुरस्कारां
मांय चयनित साहितकारां ने 11-11 हजार रिपिया साफो, शॉल, श्रीफल, माळा,
प्रशस्ति पत्र अर राजस्थानी साहित्य सूं सम्मानित करया जावेला। नेम
प्रकासन रै कांनी सूं च्यार नूंवां पुरस्कार सम्मान सरू करण री घोषणा रै
पछे इण साल सूं राजस्थानी भासा री तेरह विधावां मांय सम्मान देवणियो नेम
प्रकासन देस रौ एकलो संस्थान हुयग्यौ।
उणां बताया क इण पुरस्कारां में मोनिका गौड़ (बीकानेर) री पोथी ‘अंधारे
री उधारी अर रिसाणो चांद’ ने नेमीचन्द पहाडिय़ा पद्य पुरस्कार, कैलाशदान
लालस (जोधपुर) ‘काळजयी’ ने अमराव देवी पहाडिया गद्य पुरस्कार, शंकरसिंह
राजपुरोहित ( बीकानेर )‘मिृत्युरासो’ भंवरलाल सबलावत व्यंग्य
पुरस्कार,चांदकौर जोशी (जोधपुर)‘सेवट’ ने चम्पा देवी सबलावत कहाणी
पुरस्कार, पूर्णमल शर्मा  (रामगढ़, हनुमान गढ़ ) ‘होम’ ने कमला देवी
पहाडिय़ा उपन्यास पुरस्कार, ताऊ शेखावाटी ( सवाई माधोपुर) ‘हेली सतक सतसई’
ने मोहनदान गाड़ण राजस्थानी भक्ति काव्य पुरस्कार, कविराज भंवरदान माधवा
मधुकर ( जैसलमेर)‘हिन्द रा हीरा’ ने सोहनदान सिंहढायच राजस्थानी डिंगल
परम्परा पुरस्कार,
राजेश अरोड़ा (गजसिंहपुर श्री गंगानगर ) ‘स्टूडेंट् ऑफ द ईयर’ ने
सिरदाराराम मौर्य बाल साहित्य पुरस्कार, जुगल परिहार ( जोधपुर ) ‘ मायड़
भासा री सेवा’ ने जुगलकिशोर जेथलिया राजस्थानी भाषा सेवा पुरस्कार,
उम्मेद धानिया (राजपुरा चूरू ) ‘लेबल ’ ने छगन लाल बेताला स्मृति
राजस्थानी युवा पुरस्कार, रीना मैनरिया ( उदयपुर )‘पोतीवाड़’ ने श्रीमती
मैना देवी पांडया स्मृति राजस्थानी लेखिका पुरस्कार, नीरज दईया ( बीकानेर
)‘ पाछो कुण आसी ’ ने पारसमल पांडया स्मृति राजस्थानी साहित्य पुरस्कार
अर मुहम्मद कुरैशी निर्मल ( ब्यावर )‘ राजस्थानी गीता मानस’ ने चंडीदान
देवकरणोत अखावत स्मृति राजस्थानी अनुवाद पुरस्कार दिया जावैला।
पुरस्कारां री निर्णायक कमेटी रा संयोजक लक्ष्मणदान कविया बताया क  गांव
डेह रा कुंजल माता मिन्दर रा सभागार मांय अदितवार 3 फरवरी  ने राजस्थानी
साहित्य सम्मान समारोह मांय सम्मानित करया जावैला। इण समारोह मांय
राजस्थानी भासा री पोथ्यां रौ विमोचन भी करयौ जावैला।

No comments:

Post a comment