Saturday, 5 January 2019

राजस्थानी समाचार

मायड़ भासा राजस्थानी सारू रातीजोगै री बंतळ आज सूरतगढ़ में 

बरसां सूं आपणी अेक ई पिछाण है राजस्थानी। आज थावर 5 जनवरी री आखीरात आपां रा भाई सैण जाति पाति, धर्म, नाम, पद सब नै भूलाय'र अेक हुयर सूरतगढ़ में मायड़ भासा राजस्थानी सारू रातीजोगै री बंतळ करैला। अब तो चेतो करो। आपणी संस्कृति, संस्कार, जड़ां सब खत्म होवण लाग री है। देस दुनिया रा किसा ही खुणा मांय बैठा हो, आओ राजस्थान बचावां, राजस्थानी बचावां। मायड़ भासा राजस्थानी सारू काळजै में बळत राखण वाळा बै सगळा लोग अेको करै अर आखी रात बंतळ करण सारू आज भेळा हुवेला। अब नी तो कद?आपां नी तो कुण? जठे भी बैठा हो मायड़ भासा मानता रा आंदोलन ने जियां ही हुय सके आपो-आप ही मन मते समर्थन करो। नाके आयोड़ी बात पार पड़सी।
जय जय राजस्थानी...बाबूलाल टाक, राजस्थानी सौरम 9413365577 नागौर राजस्थान
----   ---   ----    ---    ---     ----    -----     -------      -------
बिज्जी री राजस्थानी कहाणी माथै बणी फिल्म न्यूयॉर्क फिल्म फेस्टिवल में दिखाई जावेला
नागौर. राजस्थानी साहित्यकार पद्मश्री विजयदान देथा बिज्जी री कहाणी ‘मूंछ-मूंछ का अंतर’ माथै बणी राजस्थानी लघु फिल्म अमरीका रा न्यूयॉर्क फिल्म फेस्टिवल में दिखाई जावेला।
 फिल्म निर्माता महेन्द्रदान देथा बताया क अमरीका में 14 सूं 16 जून तांई अंतरराष्ट्रीय न्यूयॉर्क फिल्म फेस्टिवल आइएनवायएफएफ स्क्रीनिंग, डिस्ट्रीब्यूशन अर अवार्ड फेस्टिवल में विजयदान देथा री राजस्थानी भासा, लोक कला अर संस्कृति ने दरसावन्ति ग्रामीण परिवेश री फिल्म ‘मूंछ-मूंछ का अंतर’ प्रदर्शित हुवेला।
------      ----------          ----------         ------------           ---------
डेह नागौर में राजस्थानी भासा रा तेरह साहित पुरस्‍कारां री हुवेला बेगी ही घोषणा
नागौर
नेम प्रकासण डेह जिला नागौर राजस्थान रै कांनी सूं राजस्‍थानी भासा री न्यारी-न्यारी विधावां सारू इण बरस 2018-19 में तेरह राजस्थानी साहितकारां ने सम्मानित करया जावेला। पुरस्कारां मांय चयनित साहितकारां ने 11-11 हजार रिपिया साफो , शॉल , श्रीफल , माळा, प्रशस्‍ति पत्र ग्‍यारहा हजार रिपिया अर राजस्‍थानी साहित्‍य सूं सम्‍मानित करया जावेला। नेम प्रकासन रै कांनी सूं च्यार नूंवां पुरस्‍कार सम्‍मान इण साल सरू करण री घोषणा रै पछे इण साल सूं राजस्थानी भासा री तेरह विधावां मांय सम्मान देवणियो नेम प्रकासन देस रौ एकलो संस्थान हुयग्यौ।
संस्थान रा पवन पहाड़िया अर पुरस्कारां री निर्णायक कमेटी रा संयोजक लक्ष्‍मणदान कविया बताया क गांव डेह रा कुंजल माता मंदिर परिसर मांय अदितवार 3 फरवरी 2019 ने हुवण वाळा राजस्थानी साहित्य सम्मान समारोह मांय सम्मान दिया जावैला। इण समारोह मांय राजस्थानी भासा री पोथ्यां रौ विमोचन भी करयौ जावैला।

No comments:

Post a comment