Tuesday, 7 August 2018

राजस्थानी सम्मान पुरस्कार समाचार

डेह नागौर में सम्मानित हुवेला राजस्थानी भासा रा तेरह साहित्यकार


नागौर राजस्‍थानी भाषा रा चार नूवां पुरस्‍कारां री घोषणा रै सागे ही नागौर जिलो राजस्थानी सहित सनमान रा मामला में आगीवाण हुयग्यौ। नागौर में राजस्थानी रा सनमान पुरस्कारां री संख्या 15 हुयगी।
नेम प्रकासण डेह जिला नागौर राजस्थान रै कांनी सूं राजस्‍थानी भासा री न्यारी-न्यारी विधावां सारू च्यार नूंवां पुरस्‍कार सम्‍मान सरु करण री घोषणा रै सागे इण बरस 2018-19 में तेरह राजस्थानी साहित्यकारां ने सम्मानित करया जावेला। पुरस्कारां मांय चयनित साहितकारां ने 11-11 हजार रिपिया साफो , शॉल , श्रीफल , माळा, प्रशस्‍ति पत्र ग्‍यारहा हजार रिपिया अर राजस्‍थानी साहित्‍य सूं सम्‍मानित करया जावेला।इण रै सागे ही राजस्थानी भासा री तेरह विधावां मांय सम्मान देवणियो नेम प्रकासन देस रौ एकलो संस्थान हुयग्यौ।
संस्थान रा पवन पहाड़िया बताया क इण साल सूं सरु करया पुरस्कारां मांय कपूरचंद बेताला छोटी खाटू रै कांनी सूं छगन लाल बेताला स्मृति राजस्थानी युवा पुरस्कार,सुनीलकुमार राजेश कुमार पाण्डया रै कांनी सूं श्रीमती मैना देवी पांडया स्मृति राजस्थानी लेखिका पुरस्कार अर पारसमल पांडया स्मृति राजस्थानी साहित्य पुरस्कार, देशराजसिंह अखावत इंदोकली कांनी सूं चंडीदान देवकरजोत अखावत स्मृति राजस्थानी अनुवाद पुरस्कार सरू करया जावैला। उणां बतायौ क गांव डेह रा कुंजल माता मंदिर परिसर मांय अदितवार 3 फरवरी 2019 ने हुवण वाळा राजस्थानी साहित्य सम्मान समारोह मांय सम्मान दिया जावैला। इण समारोह मांय राजस्थानी भासा री पोथ्यां रौ विमोचन भी करयौ जावैला।
पुरस्कारां री निर्णायक कमेटी रा संयोजक लक्ष्‍मणदान कविया बतायो क लारलै बरस 2017-18 में इण पुरस्कारां में मुकुट मणिराज कोटा री पोथी बोलो कठी जावां ने नेमीचन्‍द पहाडिया पद्य पुरस्‍कार, डॉ चेतन स्‍वामी श्री डूंगरगढ़ री पोथी निरख परख ने अमराव देवी पहाडिया गद्य पुरस्‍कार ,डॉ भरत ओळा नोहऱ री पोथी घुुळगांठ ने कमला देवी पहाडि़या उपन्‍यास पुरस्‍कार , अब्‍दुल समद राही री पोथी रमतिया बणावां ने सिरदाराराम मौर्य बाल साहित्‍य पुरस्‍कार , किरण राजपुरोहित नितिला री पोथी कांठळ ने चम्पा देवी सबलावत कहाणी पुरस्‍कार , देवकिशन राजपुरोहित चम्‍पाखेड़ी री पोथी निवण ने भंवरलाल सबलावत व्‍यग्‍ंय पुरस्‍कार , नरपत आंवड़दान आसिया री पोथी वैतालिक मेहाई सतसई ने मोहनदान गाड़ण राजस्‍थानी भक्ति काव्‍य पुरस्‍कार , डूंगरदान आसिया बाळाउ़ री पोथी लोक भावना री ललक ने साेहनदान सिंहढायच राजस्‍थानी डिंगल पुरस्‍कार अर सूरतगढ़ रा मनोज स्‍वामी ने जुगलकिशोर जेथलिया राजस्‍थानी भाषा सेवा सम्‍मान 2017 दीयो गयौ।

No comments:

Post a comment