Monday, 13 August 2018

राजस्थानी बोल उछ्ब मनावां

राजस्थानी ड्रेस कोड में मनावांला स्वाधीनता दिवस समारोह

स्वाधीनता दिवस समारोहपूर्वक मनावण री त्यारी देस भर मांय लारला दस दिनां सूं हुय रही है। राजस्थान में स्वाधीनता दिवस समारोह सूं मनावण सारू इण दिन केई परम्परावां लूंठी अर अनूठी है। आप इण दिवस रा उछ्ब ने और घणो अनूठा ढंग सूं मनाय'र छाप छोड़ सको। इण सारू आप स्वाधीनता दिवस समारोह रौ संचालन राजस्थानी भासा मांय कर अर टाबरां ने इण री महत्ता बताओ। इण दिन राजस्थानी बोलो अर आपरो सम्बोधन भी राजस्थानी सूं सरू करो। स्वामी विवेकानंद जद विश्व धरम सम्मेलन मांय ' माय ब्रदर एंड सिस्टर' सूं आपरौ भासण सरू करयो तो लोग ताल्यां बजावंता ही रहग्या। आप स्वाधीनता दिवस समारोह मांय राजस्थानी में बोलो अर बडेरां री दो च्यार केबतां सुणाय दो तो केई दिन लोग याद राखेला। जे आप राजस्थानी साफा मांय झण्डारोहण करो तो सोना में सुहागो हुवे। आज भी केई ठौड़ इण समारोह रा मुख्य अतिथि बन्द गळा रौ जोधपुरी कोट अर साफो पेहरे अर इण देसी वेस में झण्डारोहण करे। राजस्थान ने छोड़ अर देस रा सगळा प्रदेसां मांय इण दिन परम्परागत कपड़ा पहर अर टाबर मायड़ भासा में लोक गीतां री प्रस्तुति देवे।ए सगळा काम राजस्थान में भी हुवे पण बठे मायड़ भासा में ही इण आयोजनां रौ संचालन हुवे अर अठे आय'र आपां चोट खाय जावां, राजस्थान मांय कोई बिरलो ही हुवेला जको इण कार्यक्रम में राजस्थानी बोले। आप तो करो आज ही संकल्प क राजस्थानी बोलांला अर राजस्थानी ड्रेस कोड में मनावांला स्वाधीनता दिवस समारोह।

No comments:

Post a comment